Prej mëngjesit të sotëm në qytetin e Korçës, është dhënë alarmi për bombë në makinën e një gjyqtarit Markeljan Kuqo të Gjykatës së Korçës.
Dyshohet se alarmi është dhënë nga një telefonatë e cila ka njoftuar gjyqtarin se në makinën e tij është vendosur bombë dhe mësohet se telefonata është bërë nga burgu.
Në një reagim për Fax News, gjyqtari Kuqo nuk shprehet i shqetësuar në lidhje me alarmin për bombë në makinën e tij.
“Nga grushti kriminel i atdheut tim. Nuk kam asnjë lloj dijenie. Jam i qetë, nuk kam asnjë problem. Nuk kam nevojë për mbrojtje, mbrojtjen e dua nga gazetarët”, ka thënë gjyqtari në një prononcim për mediat.
Mësohet se pranë makinës është gjetur një pako e dyshimtë, e cila u shpërthye në mënyrë të kontrolluar, por nuk u kontatua lëndë plasëse.
Gjytari Kuqo vendosi pak kohë më parë lirimin e të fortit të Tiranës, Gert Gjinarari, i cili ishte dënuar për vrasjen e Naim Zyberit.
I çuditshëm dhe i dyshimtë është konsideruar vendimi i trupës gjyqësore të drejtuar nga Kuqo, për faktin se është ndaluar gjykimi i shkurtuar për dënime me burgim të përjetshëm.
Në muajin janar të këtij viti, gjykatësi Markelian Kuqo u bë objekt i emisionit investigativ ‘ Fiks Fare’ për ‘dhënie dy herë gabim të të njëjtit vendim’.
“Më datë 15.10.2019, nga një telefonatë, jemi njoftuar se në lagjen nr.3, pranë Gjykatës së Shkallës së Parë Korçë, në mjetin tip “Benz”, në pronësi të gjyqtarit M.K, i cili ndodhej i parkuar në garazhin e Gjykatës, ishte vendosur një sasi lënde e dyshuar plasëse. Menjëherë në vendngjarje, shkuan shërbimet policore të cilat bënë rrethimin dhe sigurimin e zonës. Pas verifikimit dhe veprimeve të kryera nga Njësia Antieksploziv, në mjet nuk u konstatua sasi plasëse. Grupi Hetimor nën drejtimin e Prokurorisë, po kryen veprimet e mëtejshme proceduriale dhe po punon për identifikimin dhe kapjen e autorit, i cili ka kryer njoftim të rremë në organet e rendit”, thuhet në njoftimin e policisë.
(M.Q/Faxweb.al)
Discussion about this post