Gjykata ka dhënë masën e arrestit me burg për Arkimend Lushaj të njohur ndryshe si Stresi. Avokati i tij e ka quajtur të paligjshëm këtë vendim.
Kujtojmë se Stresi u arrestua dy ditë më parë në një hotel në zonën e Linzës në kryeqytet pasi u kap me armë dhe kokainë.
Sipas avokatit të Stresit arma në dhomën e hotelit nuk ka qenë e këngëtarit po është vënë aty për të rënduar pozitat e tij. Ai i ka cilësuar si shashka mediatike gjithë sa është thënë nga ana e policisë.
Ndërkohë që pavarësisht se policia deklaroi se Stresi ishte pjesë e një grupi kriminal, derimë tani nuk ka asnjë person të arrestuar nga ana e policisë.
‘’Fakti që jemi para Gjykatës së Rrethit Gjyqësor Tiranë është e qartë që nuk kemi të bëjmë me një grup të strukturuar kriminal, pasi ndryshe do ishim në ambientet e Gjykatës së Krimeve të Rënda.
I mbrojturi prej meje po hetohet për një armë të kapur në muajin Korrik dhe masa e arrestit i është dhënë në mungesë. Gjatë kontrollit në Linzë është gjetur dhe një armë tjetër, e cila nuk është e vërtetuar që i përket klientit tim”, u shpreh avokati i Stresit.
Prindërit e Stresit e kanë konsideruar hakmarrje arrestimin e këngëtarit, pasi sipas tyre kjo vjen për shkak të padisë që Sali Lushaj bëri për shpifje ndaj Taulant Ballës.
“Si mund të quhet grup i madh kriminal kur nuk është arrestuar askush tjetër. Kjo është shpifje e fëlliqur”, shkruante Sali Lushaj, i cili shtonte se ky regjim që është vendosur në vendin tonë nuk mund t’i mbyllte gojën familjes së tij.
(E.K/FAXWEB.AL)
Discussion about this post