Një fabrikë e cila prodhonte dyshekë është përfshirë mbrëmjen e sotme nga flakët në qytetin e Kavajës e cila është në pronësi të babait të kryebashkiakut, Redjan Krali.
Biznesi i Gjergji Kralit edhe në këto momente ndodhet nën pushtetin e flakëve, ndërsa gazetarja e Fax News Alabana Aliaj raporton se një person ka mbetur i asfiksuar për të cilin mësohet se është roja e objektit.
Ai është dërguar në spital pasi ka humbur ndjenjat dhe fatmirësisht ndodhet jashtë rrezikut për jetën.
Kjo është hera e dytë që kjo godinë përfshihet nga flakët që prej ndërtimit të saj teksa dëmet në biznesin e Gjergj Kralit mendohet të jenë të mëdha.
Ngjarja është raportuar nga autoritetet se dyshohet të ketë ardhur nga shkaqe aksidentale, por që duke qenë rast i përsëritur pritet të nisin edhe hetimet.
Zjarrëfikësit e mbërritur edhe nga Tirana, Lushnja dhe Durrësi po luftojnë ende me flakët të cilat janë drejt neutralizimit, ndërsa nuk ka indicie për të shkaktuar dëme në objektet përreth. Në fabrikë janë të punësuar rreth 400 punonjës por, përveç rojes së objektit, askush nuk ndodhej aty në momentin e nisjes së flakëve.
Fabrika prodhonte dyshekë por edhe kishte shkëmbime tregtare me bizneset italiane, ndërsa dëmet mendohet të jenë shumë të mëdha.
“Rreth orës 19:10 në rrugën nacionale Kavajë-Rrogozhinë fabrika në administrim të shtetasit Gj. K, është përfshirë nga flakët, ku si pasojë ka veç dëme materiale. Policia dhe shërbimi i zjarrfikses kanë shkuar menjëherë në vendngjarje. Paraprakisht dyshohet se zjarri është aksidental. Grupi hetimor ndodhet në vendngjarje, ku po vijon punën për sqarimin e rrethanave të ngjarjes dhe shkakut të rënies së zjarrit”, njoftoi Policia.
(F.GJ/FAXWEB.AL)
