Ministri i Bujqësisë Bledi Cuçi është shfaqur shumë i shqetësuar gjatë një takimi që ka pasur sot në Himarë me drejtorët lokalë, pasi sipas tij bizneset në zonë nuk e zbatojnë ligjin për muzikën e lartë që vendoset.
Çuçi thotë se në hotelin që ai po qendronte ka qenë e pamundur që të flinte, për shkak të muzikës së lartë, dhe vetë ai është detyruar që të kryejë disa telefonata në mënyrë që volumi të ulej.
“Orari i zhurmave nuk zbatohet, në vendin ku unë po rri kam bërë katër telkefonata në numrat e policisë që janë bërë, dhe jo vetëm që nuk ka reaguar njeri, ishte një situatë e tmerrshme. U detyrova e mora personalisht atë zotërinë, që muzika të ulej brenda 3 minutash.
Kjo gjë nuk duhet të ndodhë më, drejtor të lutem shumë merr masat që të zbatohet VKM-ja, kapini shoqërojini brenda ata që kundërshtojnë, kjo gjë duhet të marrë fund, është e tmerrshme situata.
Mbrëmë dy miqtë e mi shkuan vetë te lokali ku ishte vendosur muzika, dhe ata njërin prej bokseve e kishin drejtuar nga hoteli, pra po i bënin karshillëk shtetit. Më beso drejtor se e kam shumë seriozisht këtë gjë”, është shprehur Çuçi.
Ministri është ndalur më tej dhe te aksioni për lirimin e plazheve, ku tha se asnjë metër katror i marrë jashtë ligjit duhet që tiu kthehet qytetarëve.
Një tjetër shqetësim që ai ngriti ishin kampingjet, që sipas Çuçit sjellin papastërti, sa kohë që nuk kanë as kushtet më minimale të higjenës.
“Duhet që të ketë kushte higjenike, ku kryhen nevojat personale? Ndizen zjarre aty dhe gjysma e plazhit zihet nga çadrat”, tha më tej Çuçi.
(E.K/Faxweb.al)
