Vijon të jetë mjaft e tensionuar situata në Radhimë të Vlorës, ku ka përplasje të vazhdueshme mes banorëve dhe punonjësve të IKMT-së.
Tashmë për të larguar banorët nga objektet po ndërhyjnë dhe forcat e FNSH-së, ndërsa i gjithë ky operacion po ndiqet nga sytë e shumë fëmijëve.
Prej disa ditësh tashmë në të gjithë bregdetin e Vlorës ka nisur një aksion për prishjen e ndërtesave që janë buzë detit me qëllim zgjerimin e shëtitores së Vlorës, dhe lidhjen e saj me zonën e Lungomarës.
Po sipas banorëve e gjitha kjo po bëhet në kurrizin e tyre, dhe ka një mungesë të plotë informacioni për projektin.
Siç e theksuan dhe në një lidhje të mëparshme në Fax News, banorët nuk kundërshtojnë projektin, por duan dëmshpërblim për objektet, të cilat pretendojnë se i kanë me leje. (Lexo edhe ketu)
“Po talleni me bukën tonë me fëmijët tanë, pse na trajtojnë si kafshë dhe nuk vjen asnjë njeri që të na sqarojë, nuk jemi as rrugeçër dhe as kriminela. Pse nuk na e sjellin projektin këtu që ta shohim, kemi nga 30 vite këtu”, shprehen banorët.
“E votuam Edi Ramën se thamë që do na rregullonte, ky vjen na vë fadromën tani”, shprehet i revoltuar një tjetër banor, që duket mjaft i zhgënjyer me Rilindjen.
(E.K/Faxweb.al)
