Demokratët e qytetit të Shkodrës dhe Koplikut kanë dalë në protestë në zonën e urës së Bahçallëkut, në segmentin hyrës të këtij qyteti dhe në Mjedë, në Urën e Spatharit.
Demokratët shfaqen të tensionuar duke u përplasur dhe fizikisht me Policinë, të cilët janë të shumtë në numër.
Ata kanë bllokuar rrugën dhe duan të pengojnë kryeministrin Edi Rama të hyjë në qytet të zhvillojë takimin e tij të planifikuar me drejtuesit e strukturave të PS-së.(Lexo ketu).
Të pranishëm në këtë protestë janë dhe ish-deputetët Flamur Noka dhe Bardh Spahia.
Spahia është shprehur se Policia po provokon qytetarët.
“Kjo protestë është kundër kryeministrit më të paaftë që ka pasur ndonjëherë Shqipëria, mikut të bandave kriminale të drogës. Forcat e Policisë po provokojnë qytetarët që po protestonin në mënyrë paqësore.” u shpreh Spahia.
Protestuesit mbajnë në duar pankarta “Shkodra nuk gjunjëzohet” dhe thërrasin “Rama ik”.
Ndërkohë ka një ndërhyrje dhe nga Forcat e Ndërhyrjes së Shpejtë pasi në vendngjarje janë djegur disa goma.
Sipas Policisë, protestuesit nuk kanë lajmëruar për zhvillimin e kësaj proteste dhe mendohet se do të ketë dhe shoqërime në rajon.
Gazetarja e Fax news Emi Kalaja raporton se ka gjasa që kryeministri Rama të jetë futur prej mbrëmjes së djeshme në Shkodër, për të evituar përplasjet.
(j.b/faxweb.al)
