Një incident është regjistruar pasditen e sotme në autostradën Fier–Lushnje, pranë zonës së Vajkanit, ku një automjet tip kamionçinë është përfshirë nga flakët gjatë lëvizjes.
Sipas informacionit paraprak, ngjarja ka ndodhur rreth orës 16:30 dhe dyshohet se shkaku i zjarrit ka qenë një shkëndijë elektrike. Mjeti drejtohej nga një 23-vjeçar me inicialet A. N., banues në Tiranë. Fatmirësisht, nuk raportohet për persona të lënduar, ndërsa dëmet janë vetëm materiale.
Menjëherë pas njoftimit, në vendngjarje kanë mbërritur forcat zjarrfikëse të cilat kanë ndërhyrë në kohë për neutralizimin e flakëve dhe shmangien e përhapjes së mëtejshme të zjarrit.
Furgoni është djegur në pjesën më të madhe të tij.
Për shkak të incidentit, qarkullimi në aksin Fier–Lushnje u pengua për disa minuta, por situata u normalizua pasi flakët u vunë nën kontroll.
Grupi hetimor ndodhet në vendngjarje dhe po punon për zbardhjen e plotë të shkaqeve dhe rrethanave të zjarrit.
