Pas kryedemokratit Lulzim Basha, i cili tha se Kastriotët e ngritën flamurin në 28 Nëntor 1944, dhe më pas në përpjekje për ta rregulluar gabimin tha në 1444, kur në fakt ngjarja të cilës ai i referohej kishte ndodhur në 1443-shin, serisë së gafave i është shtuar edhe fjalimi i deputetit demokrat Luan Baçi.
Deputeti Baçi tha nga qyteti i Fierit se heroi kombëtar Gjergj Kastrioti Skënderbeu kishte ngritur flamurin në qytetin e Vlorës. Kjo deklaratë nuk vjen vetëm si lapsus por si një gafë e deputetit të Fierit, pasi flamuri në Vlorë është ngritur nga Ismail Qemali në 1912, dhe Skënderbeu e ka ngritur atë në Krujë, më 28 nëntor 1443.
Nuk janë të rralla gafat e deputetëve, pasi kujtojmë se kryedemokrati gjatë fjalës së tij në Kuvend do të shprehej se 7X7 bëjn 42. Gafa apo lapsuse këto që janë kapur nga zyra e shtypit e Kryeministrit dhe vijojnë që të përdoren si një armë ndaj kundërshtarëve të tyre demokratë. Nuk duhet lënë pa përmendur dhe deklarata e kryebashkiakes së Shkodrës, Voltana Ademi e cila u shpreh se: 29 nëntori është një ditë e zezë për Shkodrën, dhe nuk mund të festohej Çlirimi në këtë datë.
(B.B/ Faxweb.al)
