Shtëpia e dy vëllezërve nga Rusani në Delvinë është grabitur dhe djegur për të dytën herë. Njëri prej tyre tregoi për “FaxNews” se çfarë ka ndodhur.
Ai u shpreh se pasi kanë marrë gjërat që ndodheshin brenda, autorët kanë djegur banesën ku ata qëndronin kur punonin tokën me ullinj.
“Janë futur brenda, pasi kanë marrë disa gjëra të çmueshme, i kanë vendosur flakën për të humbur gjurmët. Pres nga shteti të bëjë diçka. Ne i gjetëm hajdutët dhe i lanë të lirë”, rrëfeu i riu, teksa preket nga ngjarja.
Kjo është hera e dytë që shtëpia e dy vëllezërve grabitet. Në vitin 2018, atyre ju vodh prodhimi i vajit që mbanin në banesën që është djegur mesnatën e mbrëmshme. Pas ngjarjes, Gjykata e Shkallës së Parë Sarandë vendosi të dënojë vetëm njërin nga autorët.
“Ne na ka ndodhur një vjedhje në 2018, na morën vajin e ullirit me të cilin rrisim fëmijët, me të cilin mundohemi të jemi sa më dinjitoz në rrethin tonë. Hajdutët u kapën, por gjykata tha se nuk janë provat të mjaftueshme, në një kohë kur njëri prej autorëve e pranoi se e kanë bërë këtë”, tregoi i riu.
