Një incident diplomatik është shënuar në konferencën e organizuar nga qeveria, për amnistinë fiskale, ku kryeministri Rama është treguar i pakursyer me kritikat e tij në drejtim të dhomës amerikane të tregtisë, dhe të gjithë të huajve që janë kundërshtarë të kësaj nisme.
Kanë qenë ambasadorja e Francës Elizabet Barsacq dhe homologu i saj gjerman, Peter Zingraf që kanë lënë pa fjalë kryeministrin Edi Rama, pasi e kanë braktisur konferencën në momentin që kreu i qeverisë ka nisur të flasë.
Barsacq dhe Zingraf ishin të ulur në rreshtin e parë të të ftuarve në takimin e organizuar nga qeveria për amnistinë fiskale dhe kanë dëgjuar të flasë ministren e Financave, Delina Ibrahimi, zv.kryeministrin Arben Ahmetaj dhe një ekspert nga Britania e Madhe, të cilët shpjeguan specifikat e ligjit dhe përfitimet nga nisma e qeverisë.
Menjëherë sapo Rama ka marrë fjalën, dy ambasadorët shihen duke lënë sallën, ndërkohë që veprimi ka lënë për disa sekonda të heshtur dhe vetë kryeministrin.
Nuk dihet ende se çfarë i ka shtyrë dy ambasadorët e rëndësishëm që të largohen në këtë mënyrë nga takimi.
Edi Rama nga ana e tij, iu drejtua partnerëve tanë ndërkombëtarë për amnistinë fiskale, duke thënë se Shqipëria është e gatshme të aplikojë çdo ligj të këtyre vendeve nëse ai do të jetë më i shtrënguar se ai shqiptar.
“E vetmja gjë që ne jemi munduar të bëjmë në këto 3 vjet, është pikërisht kjo: Të studiojmë të gjithë amnistitë e bëra dhe të shohim të gjitha diferencat dhe të kemi një amnisti që të jetë më e shtrënguara. U them të gjithë partnerëve, në vendet tuaja janë bërë amnisti, na sillni ligjet e amnistive.
Nëse i keni pasur më të shtrënguara, se ne do t’i bëjmë siç i keni bërë ju. Asnjë nuk i ka më të shtrënguara seç është ky ligj i Shqipërisë, amnisti penale dhe fiskale flas. I keni shumë më tepër demokratike amnistitë, kështu që nuk do të na ndihmonit dot për t’i shtrënguar më shumë”, tha Rama.
(E.K/Faxweb.al)
