Kreu i Partisë Demokratike, Lulzim Basha do të zhvillojë një takim këtë të shtunë me demokratët e Durrësit, në kuadër të nismës së tij për takime në terren me strukturat përreth vendit.
Ai ka zhvilluar më herët takime në Fier dhe në Lezhë, dhe ashtu si në dy takimet e para, edhe ditën e sotme kreu i PD-së është pritur nga disa mbështetës të ish-Kryeministrit Sali Berisha.
Ata mbajnë në duar pankarta të ndryshme me thirrje kundër Bashës, ku një ndër to shkruan “Kemi bërë burg për ty dhe ti u shite te Rama”.
Pranë tyre gjenden dhe mbështetës të kreut të PD-së, të cilët kanë ardhur për të pritur Bashën dhe për te qenë pjesë e takimit të tij.
Në momentin që ky i fundit po futej në vendin ku do të mbahet takimi, mbështetësit e Berishës kanë shpërthyer në thirrje “O Sali o hero, gjithë Shqipëria dty të do”, si dhe “Basha ik”.
Gjatë protestës, ka pasur edhe tensione, teksa mbështetësit e Berishës janë përplasur me policinë. Njëri prej tyre dëgjohet të thërrasë me zë të lartë “Kë ofendon ti o shoku?”, ndërsa menjëherë shihet të ndërhyjë policia.
(E.H/Faxweb.al)
