Pas publikimit të një videoje në platformën “Harta Digjitale e Aksidenteve Rrugore”, ku një automjet tip “BMW” shihet duke kryer manovra të rrezikshme në Shëngjin, Policia Rrugore e Lezhës reagoi menjëherë.
Pas verifikimeve, u identifikua drejtuesi i automjetit, shtetasi E. B., 24 vjeç, i cili u gjobit me 40 000 lekë dhe ndaj tij nisi procedimi penal për “Prishje të qetësisë publike”.
Njoftimi i policisë:
Shëngjin
🚨Kreu manovra të rrezikshme, me automjet, ndëshkohet me masë administrative 40 000 lekë dhe procedohet penalisht, për prishje të qetësisë publike.
Menjëherë pas publikimit të një videoje në portalin “Harta Digjitale e Aksidenteve Rrugore”, në të cilën shfaqet një shtetas duke bërë manovra të rrezikshme, me automjet, në Shëngjin, shërbimet e Policisë Rrugore të Lezhës kryen verifikimet e nevojshme dhe si rezultat i tyre, u identifikua drejtuesi i automjetit tip “BMW” që shfaqet në video, shtetasi E. B., 24 vjeç.
Për shkeljen e kryer, në bazë të nenit 139 të Kodit Rrugor, ai u ndëshkua administrativisht, me 40 000 lekë gjobë. Gjithashtu, për 24-vjeçarin nisi procedimi në gjendje të lirë, për veprën penale “Prishja e qetësisë publike”.
Materialet procedurale iu referuan Prokurorisë së Lezhës, për veprime të mëtejshme.
Policia Rrugore e Lezhës falënderon median dhe qytetarët, për denoncimin e rasteve të shkeljes së rregullave të qarkullimit rrugor, si dhe i fton ata që të vijojnë të denoncojnë, pasi reagimi do të jetë i menjëhershëm, i paanshëm dhe konform ligjit.
