Mësuesja nga Fieri, Roza Deliu 50-vjeç humbi jetën tragjikisht dy ditë më parë, teksa ra nga kati i dytë duke larë dritaret.
Mësuesit dhe nxënësit e shkollës “Mark Gashi”, kanë përkujtuar sot me dhimbje mësuese Roza Deliun. Përmes një video-mesazhi prekës në faqen zyrtare në “Facebook”, thuhet se të gjithë mësuesit dhe nxënësit janë shfaqur sot me tullumbace në ngjyrën e emrit të saj.
Mes lotësh dhe duartrokitjesh ata kanë mbajtur një çast heshtje, teksa në fund kanë lëshuar tullumbacet në drejtim të qiellit.
“Kështu e kujtuam sot! Për mësuesen, miken, kolegen, njeriun! Një çast heshtje, një duartrokitje të gjatë dhe tullumbace në ngjyrën e emrit të saj. Faleminderit për atë që ishe, e mira jonë! Lamtumirë!”, shkruhet në video-n e publikuar.
Ndërkohë ditën e djeshme, kolegët e 50-vjeçares nëpëmjet një mesazhi të ndjerë i kanë dhënë lamtumirën Roza Deliut.
“Sot me zemrën që na dridhet dhe mendjen që nuk e beson e nuk e rrok dot lajmin që s’do të donim t’a merrnim kurrë, ju bëjmë me dije se kolegia jonë e shtrenjtë, mikja jonë e çmuar, gruaja e vlerë dhe mësuesja e palodhur, Roza Deliu, u largua nga jeta duke na lënë një zbrazëti të madhe. Nuk është e lehtë për ne, stafin e shkollës të ndajmë me ju këtë lajm të zi e të rëndë sepse Roza për ne ish dhe është e shtrenjtë dhe e pazëvendësueshme. Ngushëllimet tona më të ndjera familjes së saj të mrekullueshme dhe gjithë të afërmve të tjerë. Lamtumirë, gruaja me sytë e bukur, të qeshur e të gjallë, mësuesja që kurrë s’u lodh e dha më të mirën, kolegia e dashur e gjithnjë fjalëëmbël! Lamtumirë, e bukura dhe e mira Roza që qysh tani na mungon e të ardhtë e lehtë lëndina!”
Discussion about this post