Tre orë nga nisja e protestës së opozitës, ish-deputetët dhe drejtuesit e PD-së dhe të LSI-së janë ulur në shesh së bashku me qytetarët.
Në një prononcim për Fax News, kryetarja e LSI-së Monika Kryemadhi u shpreh se qytetarët janë të papunë dhe të pashpresë.
‘’Ne të papunë jemi, pyesni nëse ka ndonjë të punësuar nga kjo qeveri këtu. Protestuesit nuk kanë bërë akte dhune, janë provokuar nga policia”, u shpreh Kryemadhi.
Ndërsa nuk la pa komentuar dhe përfaqësuesit e OSBE-së në vendin tonë, teksa shtoi: Unë nuk përgjigjem për njerëz që e shohin Shqipërinë si parajsë seksi dhe parajsë parash.
Ndërkohë për Fax News ka folur dhe sekretari i përgjithshëm i PD-së Gazmend Bardhi.
Zoti Bardhi, në disa raste policia ju është drejtuar ju si organizator i protestës. Pas protestës, keni frikë për ndonjë veprim tjetër të policisë?
Bardhi: Unë nuk kam dëgjuar gjë. Në telefonin tim nuk ka asnjë thirrje nga Policia e Shtetit. Asnjë akt dhune nuk është ushtruar nga protestuesit, ju jeni dëshmitarë. Ne jemi këtu, policia të mos provokojë. Ne nuk kemi asgjë me punonjësit e policisë, ata janë sigurisht në të njëjtin hall që ka secili prej protestuesve, janë në kushte të njëjta, familjet e tyre nuk kanë bukë për të ngrënë njësoj si protestuesit që janë në shesh, dhe të garantoj se shumica e tyre, nëse nuk do të ishin me uniformë, do të ishin përkrah nesh, sepse vuajnë nga e njëjta problematikë që vuan çdo shqiptar që është sot në shesh, i shkaktuar nga ata njerëz që janë mbyllur në atë godinë dhe po detyrohen me zor të flasin. Por kam përshtypjen që nuk dinë çfarë janë duke folur.
A keni frikë zoti Bardhi për masat që mund të merren nga policia?
Bardhi: Asnjë frikë. M’u bëj të fala nga Sandër Lleshaj e gjithë strukturës poshtë tij. Sa kohë që e drejta e protestës është një e drejtë që shqiptarët e kanë fituar 30 vite më parë, as Sandër Kimiku e askush tjetër poshtë tij, as ndonjë militant i PS që ka marrë drejtimin e Policisë së Shtetit gjatë kësaj periudhe nuk mund t’i trembë – mua jo e jo – por as protestuesit e as qytetarët. Ne do të jemi këtu për të mbrojtur demokracinë, për të mbrojtur të drejtat që kemi fituar 30 vite më parë.
