Nëse e kishim parë duke puthur plaka dhe fëmijë, tashmë kryeministri Edi Rama, ka marrë rolin e Papës, dhe ‘bekon’ edhe biznesmenë.
Gjatë ditës së djeshme Rama ka puthur në ballë biznesmenin e njohur Pëllumb Salillari, me të cilin ishte bërë bashkë gjatë inagurimit të një banese të rindërtuar pas tërmetit të 26 Nëntorit.
Kishte qenë pikërisht biznesmeni Salillari ai që i kishte ndërtuar shtëpinë familjes Belegu në Petrelë të Tiranës, dhe mirënjohja e Ramës ndaj tij duket të ketë qenë e pakufijshme.
“Ne u jemi dhe do t’u jemi pranë atyre dhe çdokujt në nevojë, megjithë zemër e me të gjitha mundësitë tona”, shkruan Rama në rrjetet e tij sociale, pavarësisht se shteti në këtë rast nuk ka dhënë asnjë kontribut.
Rama shoqërohej në Petrelë dhe nga kryebashkiaku i Tiranës Erion Veliaj, si dhe nga deputeti i zonës Xhemal Qefalia.
Shumë prej biznesmenëve që operojnë në vend kanë marrë përsipër të ndihmojnë familjet e prekura nga tërmeti, në një kohë kur qeveria ende nuk ka bërë një listë me dëmet paraprake të tërmetit, edhe pse tashmë ka kaluar një muaj që nga fatkeqësia e 26 Nëntorit.
Mijëra qytetarë janë ende të akomoduar në hotele në zonën e Durrësit dhe të Golemit, ndërsa situata më problematike paraqitet në zonat rurale, ku shumë familje flenë ende në çadra, pa kushtet më minimale, dhe nën temperaturat e ulëta që ka sjellë ky fund dhjetori.
(E.K/Faxweb.al)
