Ditën e sotme u raportua se kishte përplasje mes Policisë dhe një grupi studentësh që protestonin kundër kushteve në universitete dhe konvikte si dhe tarifave të larta, ndërsa këta të fundit kanë reaguar.
Në faqen e “facebook” me emrin “Për Universitetin”, studentët shprehen se janë dhunuar nga Policia ndërsa tregojnë edhe arsyet pse kishin dalë në protestë si dhe atë çfarë ndodhi.
Reagimi i plotë:
Dhuna nuk na ndal!
Gjatë aksionit ndërgjegjësues me mesazhin “Kushtet si në Afrikë, tarifat si në Amerikë” të aktivistëve të Lëvizjes Për Universitetin në Qytetin Studenti, një grup policësh ndërhynë brutalisht duke tentuar të sekuestrojnë materialet informuese. Në shkelje të ligjit dhe çfarëdo etike njerëzore, militantët partiakë me uniformë policie kanë goditur dhe tërhequr zvarrë disa studente e studentë, pikërisht në qytetin e tyre.
Dhuna policore nuk është asgjë përpara asaj strukturore të një qeverie që vjedh studentët me tarifa të larta dhe financon pronarët e universiteteve private. Ajo vetëm sa vërteton në sytë e të gjithëve faktin që ne jemi në krahun e së drejtës dhe na forcon të vazhdojmë në rrugën tonë. Në rrugën e një universiteti të ri, vatër dijeje dhe përgatitjeje profesionale, autonom dhe të organizuar demokratikisht.
Studentët e bashkuar kanë për të fituar!
(F.GJ/FAXWEB.AL)
Discussion about this post