Prokurorët rusë janë duke hetuar rreth disa pamjeve të publikuara në rrjetet sociale, ku një udhëtare është lejuar nga pilotët e aeroplanit që të ulet në vendin e tyre gjatë fluturimit të rregullt.
Rasti ka ndodhur gjatë fluturimit mbi Siberi më 31 Gusht 2019, por video është publikuar së fundmi në internet.
Gruaja, e quajtur Ana, pa asnjë kualifikim si pilote, është e dashura e pilotit, të quajtur Kirill. Ajo është filmuar te komandat e avionit ndërkohë që zëri i pilotit dëgjohet teksa i jep udhëzime.
Ana e kishte postuar videon në Instagram, por tani është fshirë. Kompania ka thënë se dyshojnë që pamjet s’kanë lidhje me transportimin e udhëtarëve nga ana e tyre, por prokuroria ka nisur tashmë hetimet.
Televizioni rus 5-TV raportoi se piloti që e ka lejuar vajzën të ulet në kabinën e pilotimit quhet Kirill S., ndërsa për Annën thotë se është e dashura e tij ose mikeshë shumë e ngushtë. Aeroplani i përket kompanisë ruse të fluturimeve “InAero”, e cila përmes zëdhënësit ka thënë se ka nisur verifikimin e këtij rasti.
