Disa banorë të Shkozetit kanë bërë apel ndaj autoriteteve që të dërgojnë ekspertë të shikojnë banesat e tyre pasi ende nuk është dhënë ndaj tyre asnjë këshillim nëse duhet të rikthehen apo jo nëpër shtëpitë që banojnë.
Njëri prej banorëve tha për gazetaren e Fax News, Denisa Mahmutaj se po vihen re diferencime, pasi në disa pallate janë bërë inspektime ndërsa në të tijin jo, ndërsa apelon se duan vetëm një qëndrim të ekspertëve nëse është ose jo i banueshëm.
“Kemi vënë re që po bëhen diferencime nga disa pallate të tjera, për ne gjendja është shumë alarmante, kanë shkuar tek pallatet e tjera kanë bërë ekspertime, aty ku banojmë ne jo. I kemi pyetur nëse do vijnë të na tregojnë si të bëjmë, na thonë nuk kemi informacion. Ne kërkojmë të vijnë ekspertë dhe të na thonë nëse janë të banueshme banesat tona apo jo se po flemë rrugëve. Nuk dimë si të sillemi, shkojmë e vijmë sa andej këtej. Duam vetëm të na japin një qëndrim ekspertët”, tha banori.
Një zonjë u shpreh gjthashtu se po qëndrojnë tek të afërmit, ndërsa ndan të njëjtin shqetësim me qytetarin më sipër. “Vijmë marrim ndonjë gjë që na duhet brenda banesave dhe ikim me shpejtësi. Nga kati i parë deri në katin të katërt ka dëmtime serioze. Por qëndroj tek të afërmit e mijë nuk kemi zgjidhje tjetër. Duam të dimë të rikthemei apo jo”, tha ajo
“U drejtova tek bashkia, nuk mora përgjigje, ndaj ju kontaktova juve, dhe erdhët duke bërë detyrën. Kam besim tek jou në transmetimin e problemit tonë që të vijnë të bëjnë një konstatim njerëzit kompetentë. Po na lehtësoni disi dhimbjen duke treguar për mediat problemin që kemi”, tha një tjetër banor i pallatit.
Pas tërmetit që goditi vendin mëngjesin e të martës dhe la qindra banorë të pastrehë, qeveria duket se po neglizhon inspektimin e pallateve të dëmtuara. Një fakt të tillë e denoncoi pasditen e sotme për mikrofonin e Fax News një qytetar nga Durrësi.
Sipas tij, edhe pse kërkesa për inspektim është bërë që para 3 ditësh, asnjë ekspert nuk është dukur për t’iu dhënë garanci banorëve që të vijojnë jetën normalisht në pallat.
“Të vijë një ekspert të na tregojë. Nuk e dimë çfarë kolonash janë ato. Ka pak banorë, shumicat kanë ikur, shumica janë në Kavajë. Kemi bërë kërkesë për inspektim para 3 ditësh. Ai më tha që kemi dërguar një ekspert, e ka parë dhe është e sigurt. Inxhinierët që marrin vesh të vijnë ta shohin”, tha banori.
Madje, ai kërkoi ndihmë nga ekspertët e huaj, duke ju bërë thirrje që të shkojnë dhe të tregojnë nëse pallati i tyre është banueshëm. Derisa të ndodhë një gjë e tillë, banori shtoi se nuk ndërmend të kthehet në banesë prej frikës. “Të vijnë ekspertët e huaj se këta tanët s’po na thonë gjë. Është hera e parë që ky pallat pëson dëmtime nga tërmeti. Ra ai i shtatorit, por pati ca viza të lehta. Ky ishte lemeri. Mua mu duk se zgjat 1 orë. Nuk ma mban të kthehem në banesë, pa u qetësuar një çikë gjendja. Unë tani kur lëviz diçka ma jep zemra. Nuk dua ndihmë të madhe se vetëm muret janë. Të vijnë t’i shohin. Kanë aparatura e të vijnë t’i masin. Unë i lutem Zotit që të vijnë. Unë nuk rri këtu po nuk më tha njeri që këtu të rri pa frikë”, deklaroi qytetari nga Durrësi.
(F.GJ/FAXWEB.AL)
