Edhe gjatë udhëtimit të tij për në Devoll, kryeministri Edi Rama është përballur me një situatë jo të lehtë për të dhe eskortën e tij pasi dhjetra qytetarë kanë dalë në rrugë duke tëntuar ta pengojnë që të kalojë si dhe kanë hedhur shishe plastike dhe sende të forta në drejtim të eskortës së tij.
Ndërkohë siç edhe shikohet në videon e mëposhtme, dhjetra forca të policisë kanë bllokuar protestuesit në krahun e rrugës duke i mbajtur forcërisht ata.
Nga raportimet mësohet se protestuesit janë nisur të marshojnë drejt Bilishtit por Policia i ka penguar ta bëjnë diçka të tillë ndërkohë që ka pasur debate dhe tensione midis kreut të Bashkisë së Devollit nga radhët e PD-së, Bledjon Nallbani dhe drejtuesit të Policisë së Korçës, Lorenc Panganika si dhe shefit të Komisariatit të Korçës, Florian Dano.
Ndërkohë gazetarja e Fax News, Ledjona Xheladinaj raporton se në vendin ku prisnin protestuesit kanë kaluar automjetet e Ministrisë së Brendshme dhe nuk dihet nëse kryeministri po udhëtonte në ndonjërën prej tyre apo ka kaluar në rrugë alternativë ku një nga mundësitë është të ketë kaluar përmes zonës së Arrëzës.
Më herët, protestues dhe militant të Partisë Demokratike kryesisht janë grumbulluar në aksin Korçë-Bilisht, në afërsi të fshatit Cangonj, ku e kanë pritur kryeministrin me protesta.
Të pranishëm ishin edhe ish-deputetët Klevis Balliu, Endrit Braimllari dhe Ervin Salianji ku ky i fundit ka pasur edhe një përplasje me zv.drejtorin e Policisë së Shtetit, Gjovalin Loka teksa kanë hedhur akuza ndaj njëri-tjetrit.
Salianji i është drejtuar Lokës me fjalët se është I tredhur nga krimi dhe kriminelet dhe se bën të fortin me qytetarët.
Ndërkohë Loka i është përgjigjur në një formë disi kërcënuese duke I thënë se është marrë me të gjithë dhe që atë e njihte ndryshe.
(F.GJ/FAXWEB.AL)
Discussion about this post