Në një kohë që mijëra protestues janë nisur nga rrethet drejt Tiranës për protestën e opozitës që do të nisë në orën 11:00, nuk kanë munguar as rastet kur policia ka ushtruar kontrolle të rrepta dhe u ka vendosur gjoba.
Kështu në Elbasan, në rrethrrotullimin e Bradasheshit autobusave me protestues u janë bërë kontrolle të imtësishme, ndërsa janë vendosur gjoba ndaj drejtuesve të mjeteve.
Teksa autobusët shihen të ndaluar, pranë tyre ndodhet dhe një makinë e Hetimit Tatimor, që duhet se ka prerë gjobat e radhës.
Bashkë me qytetarët ndodhet dhe ish-deputeti i PD-së për Qarkun e Elbasanit, Luçiano Boçi, ku nuk kanë munguar as përplasjet. Një prej drejtuesve të mjeteve është gjobitur me 500 mijë lekë të vjetra.
Ndërkohë që burime bëjnë me dije se e njëjta situatë po ndodh edhe në këto momente në Kamëz, me qytetarët që po vijnë nga qytetet veriore të vendit.
Një postobllok me dhjetra punonjës policie dhe të Hetimit Tatimor, ka vendosur një numër të madh gjobash, ndërsa njerëzit kanë mbetur të bllokuar prej dy orësh.
(E.K/FAXWEB.AL)
Discussion about this post