Flamurtari ka fituar përballë kryesuesve të Superligës, Partizanit. Ka mjaftuar një gol i Tomislav Bushic në pjesën e parë për të përcaktuar rezultatin e të gjithë takimit. Një ndeshje e bukur për t’u parë dhe shijuar, pasi ritmi ishte i lartë dhe pati rivalitet deri në fund.
Pa Veliun, Alves dhe Siljanovski, trajneri Daja hodhi në fushë nga minuta e parë Elton Cale, i cili kishte 5 muaj pa luajtur asnjë ndeshje zyrtare, por braziliani tregoi se është në nivelin e tij më të mirë me lojën që bëri në fushë.
Ishte pikërisht Cale që harkoi një top në zonë në minutën e 9’-të dhe Bushic e shfrytëzoi më së miri duke goditur me kokë dhe mposhti portierin Xhika që më kot u hodh. Ritmi ishte i lartë në 45 minutat e para por rastet e rrezikshme ishin me pikatore. Në dy raste Koliçi u bë protagonist duke ndalur sulmin e të “Kuqve”.
Grinta dhe nervi i ndeshjes u pa edhe në pjesën e dytë, ku nuk munguan as kartonat. Partizani u hodh në sulm për të gjetur golin e barazimit por vlonjatët u mbrojtën mirë duke mos lënë hapësira. Ritmi ra paksa në fragmentin e dytë dhe kuqezinjtë marrin tre pikë me vlerë që e rikthejnë të shpresojë për kreun e kampionatit, shkruan SP.
Kjo është humbja e tretë në 14 javë për Partizanin, të cilët kryesojnë me 31 pikë, 2 më shumë se Skënderbeu. Ndërsa Flamurtari ngjitet në kuotën e 22 pikëve.
Discussion about this post