Kryeministri Edi Rama ka deklaruar në “Opinion” kohë më parë se personat që kanë rrahur biznesmenin libanez në 2016 Fadi Mitri, janë arrestuar teksa moderatori i thotë të kundërtën, se pavarësisht se kishte investiguar vetë viktima e dhunës dhe gjetur autorët, shteti nuk ishte treguar bashkëpunues me të.
Më poshtë është edhe video ku Rama shprehet se agresorët janë arrestuar ndërsa mbrëmjen e sotme njëri prej tyre ra pre e një atentati me kallashnikov në Durrës. Ai udhëtonte në makinën e prokurorit Arjan Ndoja. Edhe ky i fundit mbeti i plagosur bashkë me shoferin e tij Andi Maloku, ndërsa nuk dihet ende se çfarë i lidhte bashkë këta dy persona.
Përfundimisht, një person nën hetim për një ngjarje e cila bëri bujë në vend, pra rrahja e investitorit libanez, udhëtonte në makinën e një prokurori i cili së fundmi ishte bërë shenjestër e kryeministrit Rama drejtpërdrejt por edhe e anëtarëve të kabinetit të tij me akuzat se bashkëpunonte me krimin.
Pjesë nga biseda e Ramës me Fevziun:
Pyetje: Iku nga Shqipëria pas një dhune të pashembullt. Si mundet që shteti nuk i gjen agresorët?
Rama: O Zot, agresorët janë arrestuar, arrestuar, kanë dalë para gjykatës dhe janë liruar.
Pyetje: Biznesmeni më thotë se i ka vënë në dispozicion policisë të gjitha provat, ka bërë identifikim dhe investigim dhe nuk kanë bashkëpunuar autoritetet shqiptare me të.
Rama: Personat janë arrestuar, të lutem mos më fol banalitete.
Pyetje: Nuk janë banalitete, më ka dërgu njëmijë faqe dokumenta por nuk dua të jap as emrin se e dëmtoj personin. A keni ju përgjegjësi personalisht për rrahjen e tij?
Rama: Pyetete atë meqë ke kontakt.
(F.GJ/FAXWEB.AL)
