Çmimi i biletës për Tiranë-Durrës dhe anasjelltas prej ditës së djeshme është rritur me 30 lekë, me pretendimin e shtrenjtimit të vazhdueshëm të karburanteve, por edhe si pasojë e shtimit të lëvizjeve, duke qenë se kemi hyrë në sezonin turistik.
Fax News ka qenë i pranishëm sot në terminalin e autobusave në afërsi të kthesës së Kamzës, ku qytetarët shprehen të shqetësuar me rritjen e çmimit të biletës, ndërkohë që përdorimi i mjeteve personale është bërë thuajse i pamundur, për shkak të rritjes së kostove.
Nuk kanë munguar as momentet e tensionit dhe sherrit mes pasagjerëve dhe drejtuesve të linjave të transportit, të cilët janë justifikuar duke thënë se rritja e çmimit të biletës është e pashmangshme, duke marrë parasysh kostot që ata kanë.
Qytetarët shprehen:
-180 është shumë e vështirë, jam pa punë, me një motër të sëmurë, kanë shtyrë dhe orarin e nisjes së autobuseve. Duhet të ishin çdo gjysmë ore, ku është task forca që të ankohemi?
-Është një gabim që shteti nuk vë çmime tavan, për çdo biznesmen, populli nuk duhet të lihet i vetëm për tu përballur. Nëse rroga ime është 300 mijë lekë, me rritjen e çmimeve është vetëm 150, jetesa është bërë shumë e vështirë, ka shumë gjëra që janë të ndërlidhura.
Drejtuesit e linjave Tiranë Durrës shprehen se nuk kanë marrë kompesimin e premtuar nga qeveria për çmimin e naftës, 100 lekë për litër që ishte deklaruar.
Discussion about this post