Video/ Tensione në Sharrë, pritet shembja e 5 banesave për shkak të zgjerimit të varrezave

5 banesa pritet të shemben gjatë ditës së sotme në zonën e Sharrës në Tiranë, me pretendimin e zgjerimit të varrezave.

Asnjë prej familjeve nuk ishte dakordësuar për shembjen e shtëpive, dhe nuk kishin liruar banesat, ndërkohë që nuk kanë munguar as tensionet me punonjësit e policisë dhe IKMT-së.

Mësohet se asnjë prej 5 banesave nuk ka pasur hipotekë, pasi prej 15 vitesh kanë qenë në proces legalizimi.

“Çfarë jemi ne mo, kriminela? Jemi njerëz, ikni se është turp, ku do të rrimë ne?”, ndërkohë që një tjetër qytetare mes lotësh shprehet: Ku shkuan 25 vite që ne kemi qenë këtu?!

Qytetarët që do mbeten pastrehë u shprehën për Fax News, se dosja e tyre ka shkuar në gjykatë, dhe prishja nuk mund të kryhet sa kohë që nuk ka një vendim nga institucionet e drejtësisë.

Por pavarësisht qëndresës së banorëve, prishja e shtëpive ka vijuar, ndërkohë që fadromat e IKMT-së janë shfaqur në zonë që prej orëve të para të mëngjesit të sotëm , ndërsa aksioni mbështetet nga forcat Shqiponja.

(E.K/Faxweb.al)