Pak ditë pas publikimit të një videoje të realizuar nga imami Ahmed Kalaja ku protagonistë ishin dy lojtarët e Kombëtares Andi Lila dhe Armando Sadiku, reagon Komuniteti i Myslimanëve të Shqipërisë.
Në një letër të dërguar mediave, Komuniteti Mysliman shpreh shqetësimin se videoja ku denigrohej një prift ortodoks dhe flitej me përçmim dhe tallje ndaj riteve të krishtera, cënon harmoninë fetare.
“Rastin në fjalë e dënojmë dhe do trajtohet me seriozitetin maksimal nga Kryesia e Komunitetit Mysliman me synim që raste të tilla të mos përsëriten.”, thuhet në njoftim.
Ndërkohë pak ditë më parë ka reaguar edhe futbollisti Lila i cili ka kërkuar ndjesë publike, e cila e shkruar në anlisht linte një shije të keqe.
REAGIMI I PLOTË I KOMUNITETIT
Komuniteti Mysliman i Shqipërisë, si një institucion i promovimit të vlerave të bashkëjetesës dhe harmonisë ndërfetare, ka ndjekur me shqetësim publikimin e ndodhur disa ditë më parë, ku gjatë një bashkëbisedimi jo të kujdesshëm të shfaqur në mediat sociale midis dy futbollistëve të kombëtares dhe një imami, u la vend për keqkuptim dhe lëndim të ndjenjave dhe besimeve të tjera fetare.
Rastin në fjalë e dënojmë dhe do trajtohet me seriozitetin maksimal nga Kryesia e Komunitetit Mysliman me synim që raste të tilla të mos përsëriten.
Duke vlerësuar bashkëpunimin e frytshëm dhe korrekt me Komitetin Shtetëror të Kulteve, sqarojmë opinionin publik se bashkëndajmë shqetësimin e këtij institucioni, shprehur edhe me shkresën e fundit, në lidhje me ruajtjen dhe moscënimin e traditës së shquar të bashkëjetesës dhe harmonisë ndërfetare, vlerë e vyer kjo e trashëguar ndër vite. (D.D/Shuplaka)
Discussion about this post