Në zbatim të planit operacional të koduar “Plazhi i lirë”, strukturat e Komisariatit të Policisë Kavajë, në bashkëpunim me Policinë Bashkiake, kanë vijuar kontrollet në zonën turistike të Golemit, me fokus lirimin e hapësirave publike dhe verifikimin e ligjshmërisë së aktiviteteve që ushtrohen gjatë sezonit veror.
Gjatë kontrolleve, u konstatuan disa hapësira rrugore që ishin zaptuar dhe përshtatur në mënyrë të paligjshme, për qëllime përfitimi, pa leje nga autoritetet përkatëse.
Falë komunikimit dhe ndërhyrjes së strukturave ligjzbatuese, këto hapësira u liruan me mirëkuptim nga qytetarët që i kishin zënë.
Drejtoria Vendore e Policisë Durrës njofton se kontrollet do të vijojnë në mënyrë të pandërprerë për të garantuar rendin, sigurinë dhe të drejtën e pushuesve për të shfrytëzuar hapësirat publike të vijës bregdetare.
Policia fton qytetarët të denoncojnë çdo rast abuzimi apo paligjshmërie që cenon hapësirat publike, duke telefonuar në numrin pa pagesë 112.
