Po vijojnë në fshehtësi punimet për ndërtimin e impiantit të mbetjeve në fshatin Mbrostar të Fierit. Banorët janë duke braktisur fshatin pasi sipas tyre aty nuk jetohet. Banorët kanë protestuar edhe më parë për punimet e inceneratorit, dhe prej dy vitesh janë në proces gjyqësor me firmën e ndërtimit. Inceneratori është vetëm 800 metra larg tokave bujqësore.
Sipas banorëve, punimet po shkatërrojnë edhe rrugën. “Për ne janë shumë shqetësuese punimet. Nuk na kanë njoftuar, nuk ka folur askush me ne, gjithçka është bërë në fshehtësi. Janë shpërngulur i gjithë fshati, vetëm të vjetrit kanë ngelur. S’kemi rrugë, s’ka të ardhur këtu,” thotë një nga banorët.
Ndërsa një banor tjetër, shprehet se: “Na kanë tërhequr zvarrë së bashku me fëmijët dhe gratë. Punimet po bëhen natë e ditë. Banorët kanë ikur, pasi këtu s’ka të ardhme. Inceneratorin nuk e duam. Edhe ju si gazetarë, nëse doni të vini të shikoni punimet, duhet të merrni leje pasi nuk ju lejojnë”.
Në një nga seancat gjyqësore të mbajtura, avokatja e palës së prekur, Dorina Ndreka u shpreh se ky incinerator nuk duhet ndërtuar pasi po ndërtohet në toka bujqësore, dhe kjo është totalisht shkelje dhe sidomos po ndërtohet pa miratimin e publikut.
Discussion about this post