Pas 21 përpjekjesh të pasuksesshme, Kuvendi i Kosovës pritet të mblidhet sërish sot në përpjekje për të konstituuar legjislaturën e nëntë, që doli nga zgjedhjet e mbajtura më 9 shkurt. Seanca është planifikuar të nisë në orën 11:00.
Përpjekja e fundit më 25 maj dështoi për të 13-ën herë radhazi në krijimin e një komisioni që do të mbikëqyrte votimin e fshehtë për zgjedhjen e kryetarit të Kuvendit. Ky mekanizëm u propozua më 1 maj nga kryesuesi i seancës, Avni Dehari, por është kontestuar nga partitë që në legjislaturën e kaluar ishin në opozitë, të cilat e kanë dërguar çështjen në Gjykatën Kushtetuese.
Partia fituese e zgjedhjeve, Lëvizja Vetëvendosje (LVV), vazhdon të këmbëngulë në kandidaturën e Albulena Haxhiut për kryetare të Kuvendit, duke refuzuar kërkesat e partive të tjera për të propozuar një figurë më konsensuale. Ndërkohë, partitë opozitare thonë se mungesa e kompromisit po bllokon të gjithë procesin.
Presidentja e Kosovës, Vjosa Osmani, më 15 maj ftoi përfaqësuesit e partive në një takim për të diskutuar ngërçin politik. Ajo deklaroi se nuk pati marrëveshje për konstituimin e Kuvendit, por vuri re një “disponim minimal” për zgjidhje. Për konstituimin e Kuvendit kërkohet zgjedhja e kryetarit dhe pesë nënkryetarëve. Vetëm pas kësaj faze do të jetë e mundur të formohet qeveria e re.
