Kryeministri Edi Rama dhe kreu i Kuvendit Ilir Meta këtë mbrëmje kanë zgjedhur të darkojnë në një restorant në zonën e Pazarit të Ri në Tiranë.
Kjo darkë vjen 4 vjet pas marrëveshjes së 1 Prillit. Darka po zgjat prej 3-orësh.
Bashkë me Edi Ramën dhe Ilir Metën, në darkë janë edhe kryebashkiaku i Tiranës Erion Veliaj dhe ministri i Drejtësisë, Petrit Vasili.
Ajo që pritet prej kohësh të mësohet dhe që ende nuk është vendosur, është nëse Rama dhe Meta do të “rinovojnë” kontratën për të shkuar bashkë në koalicion edhe në zgjedhjet e përgjithshme parlamentare të 18 qershorit 2017.
Nga Asambleja e PS që u zhvillua sot, Rama u shpreh se socialistët janë gati, ndërsa i takon LSI për të vendosur.
Ditët e fundit ka pasur replika mes figurave kryesore të Partisë Socialiste dhe Lëvizjes Socialiste për Integrim, ku kjo e fundit ka shprehur kritikat e saj veçanërisht ndaj reformës në arsim.
Vendi është në krizë politike pasi opozita shqiptare ka deklaruar se do të bojkotojë këto zgjedhje.
Ajo kërkon qeveri teknike për të garantuar zgjedhje të lira, me argumentet sipas saj se kryeministri Rama do të përdorë instrumentet e krimit dhe drogës për t’i vjedhur zgjedhjet më 18 qershor. Kryeministri Rama është shprehur i vendosur për të shkuar në zgjedhje edhe pa opozitën.
(M.D/ Shuplaka)
