A kanë frikë gjyqtarët nga Vetingu dhe a është ky procesi më i drejtë që mund të bëhej? Kreu i dhomës së penalistëve Saimir Vishaj, i ftuar në emsionin e mëngjesit në ‘’Fax News” ka rezervat e tij për mënyrën sesi po kryhet procesi i spastrimit të ‘’pallatit të drejtësisë”.
Problemet që nxjerr Vishaj janë disa, teksa paralajmëron se do të ketë edhe më shumë çudira, kur do të kalojnë vetingun shkallët më të ulëta të gjyqësorit, për shkak të nivelit të ulët profesional të tyre.
Ai thotë se është e papranueshme që një gjyqtar të kushtetueses ta hetojnë tre persona të propozuar nga partitë politike, duke hedhur pikëpyetje për procesin selektiv.
Vishaj thotë se gjyqtarëve po iu shkelet privatësia me kontrollet që u janë kryer në banesat e tyre, duke iu numëruar dhe fustanet e grave.
Vishaj u shpreh: Më i rrezikshëm është ai që është i paaftë nga ana profesionale, gjyqtarët nuk janë të trembur po janë të asfiksuar. Deri më tani Vetingu ka prekur vetëm majat, kur të arrijmë te gjykata e shkallës së parë dhe e shkallës së dytë do të ketë çudira.
Kjo është një nga reformat më të ashpra, ndaj edhe ka nisur me ritme të ngadalta. Më shumë i është mëshuar pasurive dhe jo anës profesionale, që mua më duket se është shumë selektive. Ne nuk dimë ende nëse kanë kaluar në Veting ata që bëjnë vetingun, po u emëruan me lista partiake, prandaj edhe mendoj se derimë tani procesi ka qenë selektiv.
Problemi është se ku do të shkojnë paratë e tyre, kujt do ti kthehen, pasi qëllimi duket se është bërë vetëm denoncimi i pasurive, çdo ndodhë më vonë?
Mua më duket e papranueshme që një anëtar i Gjykatës Kushtetuese të vendoset nën hetim nga tre persona që janë zgjedhur nga partitë. Për mua ky proces duhej të ishte bërë nga vetë gjyqtarët, pasi një pjesë shumë e mirë e tyre marrin bukë me vete dhe s’kanë lidhje me korrupsionin.
Po a mjafton procesi i Vetingut vetëm për sistemin e drejtësisë? Për Vishajn gjyqtarët nuk janë të vetmit që mund të kenë abuzuar me detyrën. Ai thotë se ka gazetarë, moderatorë dhe mjekë me vila miliona euroshe. Po sigurisht që procesi duhet të vazhdojë dhe me politikanët, madje sipas Vishajt nuk kemi drejtësi sa kohë nuk ka persona të lidhur me qeverinë të arrestuar.
Vishaj u shpreh: Ka gazetarë dhe moderatorë që kanë pasuri më të mëdha se gjyqtarët. Po ashtu edhe me mjekët, unë kur kam ardhur fillimisht në Tiranë, kam dëgjuar njerëz që më thonin kjo është vila e filan doktori apo e filan mjeku.
Kanë nisur kontrollet për gjyqtarët në banesat e tyre, kanë shkuar që ‘tiu numërojnë fustanet e grave. Kjo është një shkelje e hapur e privatësisë. Ju trokasin në derë në mëngjes ose në mbrëmje duke iu prishur jo pak qetësinë e fëmijëve të tyre.
(E.K/FAXWEB.AL)
Discussion about this post