Viti i miut në Kinë, ka sjellë një shitje rekord të minjve të gjallë në Rusi. Në një kohë që shitësit propozojnë blerjen në çift të kafshëve, animalistët bëjnë apel që të mos dhurohen, pasi njerëzit nuk dinë çfarë të bëjnë me ta dhe i hedhin. Në prag të natës së fundvitit në Rusi është dyfishuar shitja e minjve të gjallë: Një fenomen që ndodh si pasojë e faktit që viti që vjen do të jetë Viti i Miut sipas kalendarit kinez.
Çmimi varion nga 7 deri në 15 euro, por për një mi rrace duhen të paktën 30 euro. Shitësit shpesh propozojnë një çift minjsh në mënyrë që kafshët të ndihen më mirë në shoqërinë e njëri – tjetrit. Por problem është që minjtë riprodhohen me një shpejtësi të pabesueshme: Kohët e fundit në një provincë të Moskës, një grua e cila kishte blerë një çift minjsh e gjeti shtëpinë të pushtuar nga një mijë minj, të cilët jo vetëm hëngrën të gjitha rezervat ushqimore por dhe mobiljet.
Gruaja u shtrua në repart psikiatrik, ndërsa animalistët u detyruan të shpërndajnë minjtë në të gjithë Rusinë. Kohët e fundit në shumë kosha mbeturinash në Rusi janë parë minj të racave të ndryshme, të cilët nuk gjenden në natyrë. Këto lloje nuk kanë frikë nga njerëzit dhe afrohen, në ndryshim nga ata të egrit. Bëhet fjalë për minjtë shtëpiakë që njerëzit i kanë hedhur.
