Edhe pse jemi vetëm në fillim të vitit të ri, Partia Socialiste dhe Lëvizja Socialiste për Integrim kanë nisur me avazin e vjetër.
Gërricjet e para kanë nisur midis dy aleatëve që kur Petrit Vasili sfidoi indirekt Edi Ramën për mbylljen e lojrave të fatit, ditën e ndërrimit të viteve.
Por prap Vasili, ka qenë ai që ka kritikuar qeverinë për shpenzimet e mëdha për koncertin e Ansamblit Filarmonik Vjenez. Sipas kryetarit të grupit parlamentar të LSI-së, paratë do të ishte më mirë të investoheshin për artistët shqiptarë.
Më pas ishin socialistët ata që u kundërpërgjigjën për mënyrën sesi po menaxhohet situata nga kompanitë e mirëmbajtjes së rrugëve, një dikaster që drejtohet nga LSI-ja, në këtë të ftohtë polar që ka kapluar vendin.
E vetmja çështje për të cilën dy partitë kanë rënë dakort deri më tani është për arrestimin e Ramush Haradinajt në Francë. Dy aleatët bien dakort se Kreu i AAK-së duhet të lirohet sa më shpejt dhe BE nuk duhet të përsërisë më praktika të tilla.
Megjithatë, pavarësisht debateve të herëpashershme, kryeministri Rama nuk është i mendimit se Meta do të dalë nga koalicioni.
“Aspektet taktike janë të mirëkuptueshme. Për ne nuk ka një nevojë taktike që të bëjmë sikur nuk duam, sikur ta shikojmë, sikur të presim, etj. Për LSI është kjo nevojë taktike, e respektueshme”, tha Rama një ditë para ndërrimit të viteve.
Në të njejtën ditë, edhe nënkryetari i LSI Luan Rama bëri të njëjtën deklaratë.
“Nuk kemi asnjë arsye taktike, por vetëm prioritete strategjike dhe prioriteti ynë është integrimi i Shqipërisë në Bashkimin Europian”, janë fjalët e tij.
Gjithsesi, duhet pranuar që e vetmja herë kur LSI-ja bashkoi votat me Partinë Demokratike, ka qenë në fund të 2016-ës, pikërisht për rrëzimin e buxhetit për Bashkinë e Durrësit.
Megjithatë duket se LSI nuk e ka me ngut të vendosë që tani se me kë do bëjë koalicion në zgjedhjet e qershorit. Kështu që deri në prill i bie të presim, sepse atëhere skadon marrëveshja midis dy partive në koalicion. (D.D/Shuplaka)
Discussion about this post