Qindra banorë të Kukësit kanë bllokuar urën e Kukësit, ku pritet që të kalojë kryeministri Rama, i cili ka planifikuar një vizitë në qytetin verilindor të vendit.
Bllokimi i rrugës nga qytetarët ka sjellë dhe një përplasje me forcat e shumta të policisë që janë stacionuar në hyrjen e qytetit për të mos lejuar shënimin e ndonjë incidenti mes protestuesve dhe shefit të qeverisë.
Grumbullimi i një numri të lartë policësh ka irrituar dhe protestuesit, ndërsa korrespondenti i Fax News Ermal Hallaçi raporton se ka pasur përplasje mes kryedemokratit të Kukësit Arif Rexhmata dhe drejtorit të policisë Zef Laska.
“Ai halabak nuk e meriton të vijë në Kukës, shtyjeni kordonin të sqarohemi me të“, u janë drejtuar protestuesit efektivëve të policisë.
Gjithashtu protestuesit kanë ndërtuar një tra simbolik dhe mbajnë parulla “Aeroporti është dhuratë e Kukësit, jo e koncesionarit” duke nënkuptuar investimin e vitit 2000 të Emirateve të Bashkuara Arabe si dhuratë për qytetin e Kukësit pas pritjes së qindra mijëra refugjatëve kosovarë gjatë krizës së luftës së vitit 1999.
Por kryeminstri Rama ka përdorur rrugën ajrore për të mbërritur në Kukës, ndërsa menjëherë pas marrjes së lajmit protestuesit janë nisur në këmbë drejt aeroportit me thirrjet: Rama ik!
Në lidhje me këto zhvillime ka reaguar dhe ish-kryeministri Sali Berisha i cili në një postim në FB ka shpërndarë një video me shënimin: Mbi 1200 policë shoqërojnë Edvin urrejtjen në Kukës.
Udhëtimi i Ramës u lajmërua 3 ditë më parë nga kandidati i përfolur për Bashkinë e Kukësit në zgjedhjet e ardhshme vendore në Kukës, Safet Gjici (lexo këtu).
Ndërsa qeveria konfirmoi këtë vizitë, dje kryebashkiaku i Kukësit, Bashkim Shehu në një deklaratë të tijën tha se: Kukësi i Nobelit për Paqe nuk mund ta presë kryeministrin që nuk e trajtoi asnjëherë këtë qytet si pjesë të programeve qeveritare, që po e varfëron çdo ditë e më shumë me taksën e Rrugës së Kombit dhe që është pro ndarjes së Kosovës (lexo këtu)
Faxweb.al
Discussion about this post