Një supermarket ra pre e grabitjes ditën e djeshme në qytetin e Korçës. Autori mundi të grabisë 100 mijë lekë të reja dhe të arratisej. Pavarësisht përpjekjeve të tij për t’i shpëtuar policisë, ai u arrestua si rezultat i bashkëpunimit të bluve të Korçës dhe Librazhdit.
Autori i grabitjes është identifikuar si Rodolf Laloti 35 vjeç, banues në Korçë. Në pranga ka rënë edhe ndihmësi i tij, shtetasi me iniciale R. M. 17 vjeç, banues në Morave të Korçës. Të dy të arrestuarit janë persona me precedent penalë të mëparshëm për vjedhje.
Arrestimi i 17-vjeçarit u krye pas kapjes në flagrancë me 3200 lekë të reja, të cilat ishin pjesë e lekëve nga shuma që Laloti kishte vjedhur në supermarket.
Detaje të Policisë së Korçës:
Policia arreston në flagrancë dy shtetas për veprat penale : “Vjedhja” dhe “Moskallëzim i Krimit”.
Specialistët e Seksionit për Krimet, në Komisariatin e Policisë Korçë, bënë kapjen dhe arrestimin në flagrancë të shtetasve :
- Rodolf Laloti, 35 vjeç, banues në Korçë dhe
- R.M, 17 vjeç, banues në fshatin Moravë–Korçë (të dy të dënuar më parë për “Vjedhje”)
Pasi më datë 30.03.2017, rreth orës 16.47 shtetasi Rodolf Laloti, ka vjedhur nje sasi lekësh tek një supermarket, në lagjen nr 1, bulevard “Republika” në Korçë, ku dhe është regjistuar nga kamerat e sigurisë të këtij supermarketi.
Lidhur me këtë ngjarje ka pasur dijeni edhe shtetasi R.M, gjatë kontrollit të të cilit shërbimet policore i gjetën dhe sekuestruan në cilësinë e provës materiale një sasi prej 3.200 lekë te reja, por nuk ka kallëzuar.
Nga hetimet e kryera rezulton se këtë sasi lekësh, shtetasit R.M, ia kishte dhënë Rodolf Laloti duke i sqaruar se këto të fundit, ishin një pjesë e lekëve nga shuma që ky i fundit kishte vjedhur në supermarket.
Materialet i kaluan Prokurorisë të Rrethit Gjyqësor Korçë për veprat penale : “Vjedhja” dhe “Moskallëzim i Krimit” parashikuar nga nenet 134 dhe 300 të Kodit penal.
(XH.A/SHUPLAKA)
