Vjen firma, Lewandowski bavarez deri në 2021

Robert Lewandowski rinovon me Bayern Munchen. Sulmuesi polak ka zgjatur dhe për dy vite të tjera kontratën e tij me bavarezët.

Marrëveshja aktuale e Lewandowskit me kampionët e Gjermanisë përfundonte në vitin 2019, ndërsa kontrata e re parashikon një zgjatje deri në vitin 2021.

Rinovimi i polakut është dhe një sinjal i qartë se ai nuk do të largohet nga “Allianz Arena” pavarësisht se vitet e fundit kërkesat për të kanë qenë të shumta.

Vetë Lewandowski u shpreh mjaft i kënaqur për arritjen e kësaj marrëveshje dhe faktin që do të qëndrojnë dhe për disa vite të tjera në “Allianz Arena” me besimin se do të dhurojë sërish gola të shumtë për tifozët e klubit gjerman.

Pasi hodhi firmën mbi kontratën e re, sulmuesi tha: “Bayern më jep gjithçka që duhet për të realizuar ëndrrat e mia. Sfida të reja na presin! MiaSanMia”

Për rinovimin me polakun foli edhe Shefi Ekzekutiv i Bayern Munchen, Karl-Heinz Rummenigge: “I lumtur që rinovuam me një nga sulmuesit më të mirë në botë dhe që do të jetë pjesë e skuadrës për shumë vite të tjera”.