Një hetim i Organizatës për Ndalimin e Armëve Kimike, konfirmoi sot se gazi nervor, sarin, është përdorur në sulmin vdekjeprurës më 4 prill në një qytet sirian, shkruan VOA.
Sulmi në qytetin Khan Sheikhoun në krahinën siriane të Idlibit, la më shumë se 90 të vdekur, përfshirë gra e fëmije dhe nxiti zemërim gjithandej nëpër botë derisa fotografitë dhe videot e shpërndara treguan fëmijët që po përpëliteshin teksa po vdisnin para kamerave.
Në një deklaratë të Departamentit amerikan të shtetit, thuhet se “faktet pasqyrojnë një dëshmi të përdorimit të neveritshëm dhe shumë të rrezikshëm të armëve kimike nga regjimi i Asadit”.
Presidenti Trump, ishte mbështetur në imazhet e pasojave të sulmit në Khan Sheikhoun, kur nisi sulmin ndëshkues me raketa dy ditë më pas, në bazën ajrore të kontrolluar nga qeveria siriane, prej nga zyrtarët amerikanë thanë se ushtria e Sirisë kishte kryer sulmin kimik.
Ai ishte sulmi i parë i drejtpërdrejtë amerikan mbi qeverinë siriane dhe urdhri më dramatik ushtarak i presidentit Trump, që kur ai mori postin disa muaj më parë.
Presidenti sirian, Bashar al-Assad, ka mohuar të ketë përdorur armët kimike. Aleati i tij, presidenti rus Vladimir Putin, tha më herët gjatë këtij muaji se ai besonte që sulmi ishte “një provokim” i organizuar nga njerëz që donin ta fajësonin atë (Assadin) për këtë”.
(M.D/Shuplaka)
