Të shtëna me armë zjarri janë shënuar mesditën e kësaj të premteje në qytetin e Vlorës, ndërsa policia nxitoi të jepte një njoftim se autori kishte qelluar me armë dhe më pas ishte larguar.
Por burime për Faxweb.al bëjnë me dije se ngjarja nuk ka qenë dhe aq banale, pasi një person rezultoi që kishte humbur kontaktet me familjarët pas të shtënave.
Pronari i një makine Porche, që u gjet në vendngjarje me dyer të hapura, me inicialet E.V, ka telefonuar bashkëshorten dhe i ka thënë “për pak më vranë”, por që pas kësaj telefonate ka humbur të gjitha kontaktet, për minuta të tëra.
Por më rreth një orë më vonë personi është gjetur, dhe ka pretenduar se ishte larguar nga vendngjarja, për shkak se ishte trembur nga të shtënat.
Shtetasi E.V është shoqëruar në polici dhe është marrë në pyetje, ndërsa ende nuk është bërë e mundur identifikimi i personit që qëlloi armë.
Njoftimi i policisë:
Rreth orës 11:40, ka ardhur një telefonatë se një person dyshohet të ketë qëlluar me armë zjarri në ajër, në lagjen “10 Korriku” Vlorë.
Janë ngritur grupe të posaçme për kontrollin e territorit dhe po punohet për kapjen e autorit.
Bëjmë me dije se nuk ka asnjë person të dëmtuar.
Grupi hetimor po punon për sqarimin dhe zbardhjen e rrethanave të ngjarjes.
