Falë ndërhyrjes së menjëhershme të shërbimeve të Policisë së Shtetit, janë parandaluar dy ngjarje të rënda kriminale me pasoja të mundshme për jetën, në qytetin e Vlorës.
Shërbimet e DVP Vlorë, në bashkëpunim me ato të Komisariatit të Policisë Vlorë, arrestuan në flagrancë 2 shtetas të dyshuar për plagosje të rëndë, konkretisht:
-
Olsian Xhanaj, 23 vjeç – u arrestua për veprën penale “Plagosja e rëndë me dashje”, pasi dyshohet se më datë 9 korrik, rreth orës 19:30, në lagjen “Kushtrimi”, gjatë një konflikti për motive të dobëta, ka goditur me levë hekuri në kokë shtetasin E. D., 33 vjeç. I dëmtuari ndodhet nën kujdesin e mjekëve, jashtë rrezikut për jetën.
-
Edmond Zanaj, 56 vjeç – u arrestua për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”, pasi rreth orës 19:45, në lagjen “Uji i Ftohtë”, gjatë një konflikti për motive të dobëta, ka goditur me thikë shtetasin M. I., 64 vjeç. Edhe ky shtetas është jashtë rrezikut për jetën.
Policia e Shtetit thekson se do të vijojë pa ndërprerje kontrollet intensive për parandalimin e krimeve dhe rritjen e sigurisë publike, veçanërisht gjatë sezonit turistik.
Materialet procedurale për të dy rastet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
