Policia e Tiranës ka finalizuar me sukses një operacion hetimor për zbardhjen e 10 rasteve të vjedhjeve të biçikletave dhe motomjeteve elektrike, të kryera gjatë periudhës janar-qershor në kryeqytet.
Specialistët për Hetimin e Krimeve në Komisariatin e Policisë Nr. 4, pas kallëzimeve nga qytetarë për vjedhjet e biçikletave dhe monopatinave në lagje të ndryshme, organizuan menjëherë punën në bashkëpunim me Komisariatin e Policisë Nr. 1 dhe Nr. 2.
Falë veprimeve të shpejta hetimore dhe analizës së pamjeve filmike, u identifikuan dy shtetas, të cilët janë të dënuar më parë për vjedhje: A. H., 34 vjeç, banues në Tiranë, i cili u vu në pranga, dhe F. T., i cili po ndiqet në gjendje të lirë.
Policia bën me dije se hetimet për zbardhjen e vjedhjeve të tjera të mundshme nga këta persona vijojnë.
Materialet procedurale janë referuar Prokurorisë së Tiranës për veprime të mëtejshme.
