Vodhi edhe bashkëshorten e ish-zyrtarit të policisë, flet hajdutja seriale

Vuajtja e dënimit me burg për akuzën e “vjedhjes” nuk ka dhënë asnjë lloj efekti rehabilitues te një 42-vjeçare, e njohur  si hajdute seriale.

6 ditë pasi ka dalë nga qelitë e burgut, shtetasja Rosalinda Konomi është kthyer sërish aty, po si e dyshuar për kryerjen e një vjedhjeje.

Ajo i ka qëndruar “besnike” skemës së saj të zakonshme sa i përket mekanizmit të kryerjes së veprës penale, por edhe shënjestrave të saj.

42-vjeçarja që ndryshon shpesh vendbanimet e saj nëpër kryeqytet ka vjedhur çantën e një klienteje të një dyqani rrobash për fëmijë në kryeqytet, ku ndodheshin 4500 lekë.

Konomi u paraqit dje në Gjykatën e Tiranës, ku u përball me kërkesën e prokurorisë për caktimin ndaj saj të masës së sigurisë “arrest në burg”. Me gjithë qëndrimin mohues të së dyshuarës, gjyqtarja e gatshme Marjana Dedi vendosi dje miratimin e kësaj kërkese, shkruan Panorama.

Gjatë seancës gjyqësore të zhvilluara me dyer të mbyllura, Konomi  është përpjekur të shfajësohet, duke kundërshtuar pretendimet e prokurorisë. Para trupit gjykues ajo ka pretenduar se çantën dhe paratë që ndodheshin në të i ka gjetur në trotuar dhe se nuk e kishte vjedhur atë.

Rosalinda Konomi është përsëritëse në veprën penale për të cilën akuzohet.

Një javë më parë ajo përfundoi një dënim me 2 vjet e 6 muaj heqje lirie caktuar ndaj saj përmes një vendimi të Gjykatës së Tiranës, në qershor të vitit 2016.

Për shkak të gjykimit të shkurtuar, ajo përfitoi uljen e një të tretës dhe përfundimisht u dënua me 1 vit e 8 muaj burg. Ajo u gjykua si autore e të paktën nëntë rasteve të vjedhjes së çantave dhe portofolave të grave të tjera. Në një nga këto raste “preja” e saj ishte edhe bashkëshortja e një zyrtari të lartë të Policisë së Shtetit.

Ajo ruante momentin kur pronaret e çantave, klientet të tjera në dyqan, futeshin në dhoma provash. Në këtë moment ajo merrte çantat ku ndodheshin telefona e portofola dhe largohej me shpejtësi. Prokuroria dokumentoi nëntë episode të kryera gjatë shkurtit 2016, të ndodhura kryesisht në rrugën “Mine Peza”, në rrugën “Reshit Petrela”, “Ded Gjo Luli” dhe te “Tregu çam”.

Në shkurt 2016 vodhi bashkëshorten e ish-zyrtarit të Policisë Ardian Çipa. (M.D/Shuplaka)