Sipas policisë, personat të cilët kryejnë krime si grabitje me armë, në mbi 60% të rasteve ata janë të proceduar edhe më parë penalisht.
I tillë është edhe rasti i një 20-vjeçarit, i cili grabiti një automjet tip “Porsche” dhe më pas plagosi efektivin e policisë Nikolin Gjergji, duke i rrezikuar seriozisht jetën.
Bëhet fjalë për të riun Aldi Lleshaj nga Kurbini, i cili edhe më parë kishte plagosur një person.
Televizioni Top-Chanel ka siguruar vendimin e Gjykatës së Kurbinit, e cila liroi të riun problematik.
Në vendimin e datës 12 tetor të këtij viti, dhënë nga gjyqtari Aurel Arapi, grabitësit i është caktuar masa e sigurisë detyrim paraqitje, ndonëse ndaj tij rëndonin 2 akuza.
Sipas televizionit, gjyqtari ka vepruar brenda kuadrit ligjor pasi masa e butë është kërkuar nga prokurori i çështjes, Bardhyl Shehu.
“Gjykata nuk mund të caktojë një masë sigure më të rëndë se ajo e kërkuar nga prokurori”, shkruhet në Kodin e Procedurës Penale, ku bazohet edhe Arapi.
Lleshaj për momentin ndodhet në spital, pasi mbeti i plagosur në këmbë gjatë operacionit të RENEA-s.
Gjithsesi ai pritet të lërë spitalin sëshpejti dhe do t’i nënshtrohet një ekspertize mbi gjendjen e tij mendore, pasi në momentin e arrestimit është shprehur se ishte “mbret dhe i pavdekshëm”. (D.D/Shuplaka)
Discussion about this post