“Kryetarja e Bashkisë nuk mund të përfundojë në burg”, Voltana Ademi i dërgon mesazh IKMT dhe Lleshajt: Kam nevojë për…

Kryebashkiakja e Shkodrës, Voltana Ademi është përplasur me inspektorët e IKMT që po bëjnë prishje në zonën e plazhit të Velipojës.

Teksa qëndronte në vendngjarje për të mos lejuar prishjen e ndërtesave, i dërgoi mesazh kryeinspektores Dallëndyshe Bicit dhe Ministrit të Brendshëm Sandër Lleshaj duke u thënë: “Kam nevojë të kem urdhrin e ekzekutimit të IKMT. Ju faleminderit, Voltana Ademi. ”

Më tej, vijoi të fliste para gazetarëve duke theksuar se prishja po bëhet pa lejen e saj dhe “nuk mund të përfundojë në burg se policia e shtetit është inkriminuar.”

“Policia ka lejuar në pandemi me parregullsi që të lëvizin në Shkodër dhe këtë nuk mund t’ia hedhin Bashkisë Shkodër sepse kryetarja nuk mund të përfundojë në burg se policia është e inkriminuar. Këtë nuk ia lejoj askujt. Ky është diskutimi që kam bërë me Sandër Lleshin në Velipojë”, tha Ademi.

Përveç kryetares së Bashkisë së Shkodrës, ministri Lleshaj ka patur përplasje edhe me kryebashkiakun e Lezhës Pjerin Ndreu. Ditën e djeshme debatuan për shembjen e ndërtimeve pa leje në këtë periudhë ku ka nisur edhe sezoni turistik, pas kalimit të kompetencave për mbrojtjen e mjedisit te Ministria e Brendshme.

Ndreu i ka thënë qartë Ministrit të Brendshëm dhe atij të turizmit se ata që mendojnë se mund ti përdorin kryebashkiakët si policë, e kanë gabim. Ndërkohë Lleshaj ka thënë se aksionet që kanë bazë ligjore, nuk mund të kenë nevojë për kosnultimin e kryebashkiakëve. (Lexo debatin e plotë)