Është prezantuar projekti për shembjen e disa banesave në Vorë për nisjen e procesit të rindërtimit, ndërkohë që banorët shprehen se disa banesa nuk është e nevojshme të shemben, ndërkohë ndajnë shqetësimin për mungesën e një kontrate të shkruar si dhe vetë projektin.
Banorët e qytetit të Vorës janë ngritur në protestë ditën e sotme në lidhje me procesin e rindërtimit të banesave dhe objekteve të dëmtuara nga tërmeti i 26 Nëntorit, ndërsa pretendojnë se janë kundër planit që ju është prezantuar.
Ata thonë se po tentohet të ndërtohet një markatë në mes të lagjes së banuar, si dhe u është kërkuar të firmosin në një fletë të bardhë për shembjen e banesave të tyre, por që nuk ka një kontratë të shkuar se kur, si dhe ku do të rindërtohen banesat e tyre pasi kanë frikë se mund ti largojnë nga zona ku banojnë aktualisht.
“Nuk e kemi firmosur ne, ka ardhur nga qeveria e Tiranës, për çfarë e kemi kryetarin këtu. Më prishet një njësi? Dua të di kontratën sepse mund të më largojnë nga këtu ku të duan ata. Pa firmë pa vulë, pa protokoll”, tha një banor.
“Urdhri i kryeministrit është se aty ku do të shembet aty do të ndërtohet. Të kap rruga më thotë, Ja ku e kam planin, Firma “Bleta” e ka kthyer pallatin përmbys dhe do të bëjë markatë, asnjë vend të botës nuk bëhet markatë në qendër banimi. Bëhet vetëm për interesat e tyre”, tha një tjetër banor.
“Na dhanë një letër boshe për të firmosur shembjen e shtëpisë, si mund të jem dakord për të më prishur shtëpinë kur nuk kam një kontratë të shkruar, të vulosur. Do caktohet shkalla, hyrja, si do ndahen shtëpitë. Unë e kam shtëpinë në zonën një do e marr ku t’ju teket, si në kohën e Enver Hoxhës”, shprehu shqetësimin një qytetar.
(F.GJ/FAXWEB.AL)
Discussion about this post