Kryekomsioneri Shtetëror i Zgjedhjeve, Ilirjan Celibashi tha sot se vota e diasporës nuk është në rrezik.
Në një konferencë për mediet, teksa u pyet nga gazetarët në lidhje me çështjen e afatit të regjistrimit të partive politike apo kandidatëve, gjë që mund të sjellë probleme për votën e diasporës, Celibashi tha se kjo duhet të vlerësohet me maturi dhe mënyrë profesionale nga partitë politike.
“Procesi i votimit nga jashtë nuk është në rrezik, zero. Nuk po shkon drejt dështimit. Dikush mund ta shohë ndryshe, por thënë nga ne, ky proces që sot flasim nuk është në rrezik. Ka problematika që duhet të adresohen, por që me siguri do të ketë një zgjidhje. Nëse do të duhet të paguajmë më shumë para, do të ketë zgjidhje, nëse duhet të ndryshohet Kodi Zgjedhor, do të jetë kjo zgjidhje. Duhet të ulemi me mënyrë profesionale dhe maturi”- tha Celibashi.
Duke iu referuar shqetësimit të operatorëve postarë për të dërguar dhe sjellë votën, Celibashi tha se duhen riparë afatet e regjistrimit të kandidatëve, partive politike, koalicioneve apo edhe kandidatëve.
“Të gjithë aktorët do të duhet të punojnë së bashku për të gjitha ato problematika. Ka disa çështje në fakt, ne si institucion bazuar në çfarë kemi zhvilluar konsultime me qëllim të realizmit të procesit të votimit nga jashtë, kemi dalë në përfundimin që ka disa aspekte të këtij procesi që nuk lidhen me Komisionin Qendror të Zgjedhjeve, vetëm por dhe me aktorë të tjerë do të duhet ta konsiderojnë”, u shpreh ai.
“Informacioni që i kemi përcjellë partive politike dhe Kuvendit, mbi afatet që duhen për dërgimin e fletës së votimit dhe kthimin pas në KQZ, marrë këto afate sipas raportimeve të bëra nga operatorët postarë. Rezulton që mund të ketë një problematikë, ne e kemi sjellë në vëmendje. Do të preferoja më saktë, nuk dua të jap këshilla, por këtë çështje ta trajtojnë në mënyrë profesionale serioze dhe me maturi”, vijoi Celibashi.
“Sipas dispozitave aktuale të Kodit Zgjedhorë, procesi i regjistrimit të kandidatëve, parti politike, koalicion dhe kandidatë, përfundon normalisht 30 ditë para datës së zgjedhjeve. Mund të përfundojë edhe 42 ditë para datës së zgjedhjeve, sikurse është edhe dita e fundit, por teorikisht ekziston mundësia që ky proces të përfundojë 30 ditë para ditës së zgjedhjeve”, sqaroi ai.
“Me operatorët e shërbimit postar dhe nuk është konkluzion që e kemi nxjerrë ne është fakt, kanë thënë që ne normalisht do të duam të kemi 40 ditë në dispozicion, nuk është se ky ka qenë qëndrimi i një operatori, kanë qenë 3 operatore, emrat të njohur të shërbimit postar ndërkombëtarë. Të cilët kanë thënë s ene zakonisht këtë proces në vend të tjera e kryejmë në kufij të 60 ditëve mund të themi se 40 ditë janë normale dhe dikush prej tyre tha se rasti më i keq do të ishin 30 ditë, por nuk ofrohet garanci që shkon fleta e votimit dhe kthehet. Jam duke thënë atë që ekzaktësisht çfarë është prezantuar prej tyre në ketë konsultim të zhvilluar në KQZ”- tha Celibashi.
Celibashi nënvizoi se nga ana e KQZ-së, çdo gjë do të jetë e qartë, që nesër të mos ketë mundësinë askush ta drejtojë gishtin te KQZ.
