Kryetari I KQZ-së, Ilirjan Celibashi ka publikuar listën me pikat e DHL-së të hapura sot në Greqi. Në një postim në rrjetet sociale, Celibashi u është drejtuar me një mesazh votuesve nga jashtë me banim në Greqi.
“Në listën e shfaqur keni pikat e DHL të hapura sot në mbarë Greqinë dhe orarin e punës së tyre për datën 3 Maj 2025”, deklaron Celibashi krahas listës së publikuar në rrjetet sociale. Edhe një ditë më parë, Komisioni Qendror i Zgjedhjeve nëpërmjet një njoftimi zyrtar për votuesit në Korfuz, Greqi, bëri më dije se “në datat 2, 3 dhe 4 maj, shërbimi postar DHL do të jetë i pranishëm në katër pika të ndryshme në ishullin e Korfuzit, për të mundësuar marrjen dhe dorëzimin e zarfeve zgjedhore”.
KQZ publikoi informacionin e detajuar mbi adresat e pikave të shërbimit, oraret e operimit dhe zonat që mbulohen nga secila pikë. “Gjatë këtyre orareve, qytetarët mund të plotësojnë fletën e votimit në vend dhe ta dorëzojnë menjëherë te përfaqësuesi i DHL”, njoftoi KQZ.
