Kreu i Komisionit Zgjedhor të PD-së, Jemin Gjana, pak orë para mbylljes së procesit të votimeve në zgjedhjet për kryetarin e ri të PD-së, u është përgjigjur deklaratës së Eduard Selamit për parregullsitë e ndodhura.
“Jam vënë në dijeni në orët e mëngjesit, ka pasur një problem të tillë se një pjesë e degëve të PD i kanë pasur vendvotimet në zyrat e partisë dhe për fat të keq s’është normale, kemi dhënë urdhër të largohen, nuk është bërë në mënyrë të qëllimshme, ne kemi vënë vendet e votimit aty, kam dhënë porosi të hiqen fotot e kandidatëve.
Me udhëzime që kemi shkruar kemi kërkuar me insistim që brenda vendvotimeve në të gjitha komisionet të pranishëm janë vetëm anëtarë që votojnë dhe komisionerë, kush ka vepruar ndryshe ka vepruar gabim. Per mungesen e emrave në lista, s’kam asnjë ankimim”, tha Gjana për mediat.
Sakaq, ai ka deklaruar se deri më tani nuk ka patur probleme dhe incidente dhe se procesi i votimit ka qenë i rregullt.
“s’ka patur probleme dhe incidente, deri tani vlerësojmë se kemi të bëjmë me një proces të rregullt dhe korrekt. Presim mbylljen dhe fillimin e tërheqjes së materialeve nga qendrat e votimit, që nga mesdanata të fillojmë procesin e numërimit”, është shprehur Gjana.
Gjana ka dhënë edhe të dhënat e para, përsa i takon pjesëmarrjes: “deri në orën 4 e 30, jemi në të njëjtët parametra që kemi pasur në vitin 2013, 41-42 mijë pjesëmarrës në votime.” (D.D/Shuplaka)
Discussion about this post