Konfliktet mes grupeve të të rinjve në Angli, të kthyera prej kohësh në një problem për këtë vend për shkak të numrit të lartë të viktimave që kanë shënuar, këtë radhë prekën komunitetin shqiptar. 15 vjeçari nga Kosova, Elton Gashaj, u gjet i qëlluar më thikë në parkun Salt Hill të kryeqytetit britanik e më pas, nga plagët e marra, i riu ndërroi jetë.
Një tjetër 15-vjeçar sipas policisë, është arrestuar në lidhje me vdekjen e tij dhe po mbahet në paraburgim. Një tjetër djalë 17 vjeç, i ndaluar edhe ai në të njëjtën kohë, u la i lirë. Detektivët thonë se goditja ka ndodhur pas një sherri që ka përfshirë një grup djemsh, e që mund të ketë qenë për drogë.
Ata shtuan se në momentin e ngjarjes, në park ka pasur mjaft njerëz dhe apeluan që dëshmitarët e mundshëm okularë të bëjnë përpara, sidomos ata që mund të kenë edhe pamje filmike të regjistruara me telefona celularë. Në një rrëfim të dhimbshëm, e ëma e viktimës u shpreh se e kishte lajmëruar disa herë policinë se i biri ishte kërcënuar pasi po shoqërohej me njerëzit e gabuar.
“I kam thënë policisë se djali im nuk ishte i sigurt. Dy apo tre herë është zënë me disa djem. Kishte thyer krahun, më tha se ra nga biçikleta, por ai shoqërohej me njerëz jo të mire; mua më thoshte se do të ndryshojë”, ka thënë mes dhimbjes nëna e 15-vjeçarit. Një fqinjë e adoleshentit e ka përshkruar atë si djalë shumë të sjellshëm, e thoshte se dhe në shkollë, kishte qenë nxënës i mirë.
Discussion about this post