Policia e Shkodrës njofton se ka vënë në pranga një prej të rinjve të shpallur në kërkim në lidhje me vrasjen e 33-vjeçarit Valter Fierza, mbrëmjen e djeshme pas një konflikti për parkimin.
Në pranga ka përfunduar Paolo Mëhilli, vëllai i 24-vjeçarit që qëlloi me armë Fierzën duke i marr jetën.
Ngjarja ndodhi mbrëmjen e së enjtes në fshatin Hot i Ri jashtë një lokali ku 5 të rinjtë u konfliktuan me vëllain e viktimës për një vend parkimi dhe kur Valter Fierza u afrua me makinë, 24-vjeçari e qëlloi.
Njoftimi i policise:
Shkodër
Si rezultat i kërkimeve intensive, kontrolleve të vazhdueshme dhe veprimeve të shpejta operacionale, specialistët për Hetimin e Krimeve të Drejtorisë Vendore të Policisë Shkodër dhe ata të Forcës së Posaçme “Shqiponja”, lokalizuan, kapën dhe vunë në pranga shtetasin e shpallur në kërkim P. M., 22 vjeç, banues në fshatin Hot i Ri.
22-vjeçari dyshohet se ka qenë i përfshirë në një konflik të çastit, jashtë një lokali në fshatin Hot i Ri, ku mbeti i vrarë shtetasi V. F., 33 vjeç.
Vijojnë kërkimet për kapjen e 4 shtetasve të tjerë të shpallur në kërkim për këtë ngjarje.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
