Kreu i Lartë i Shtetit, Bujar Nishani, është nisur për një vizitë zyrtare në Turqi, i shoqëruar nga Zonja e Parë, Odeta Nishani. Vizita zyrtare nuk është anuluar pavarësisht ngjarjes tronditëse si ajo e vrasjes së ambasadorit rus Andrei Karlov.
Ky takim do të zhvillohet me ftesë të homologut turk Recep Tayyip Erdogan. Presidenti i Republikës së Shqipërisë do të zhvillojë një takim kokë më kokë me Erdogan, për të vijuar më pas me kryeministrin turk dhe kryetarin e Asamblesë së Madhe Kombëtare të Turqisë.
Njoftimi i Presidencës
Me ftesë të Presidentit turk Erdoğan, Kreu i Shtetit, Sh.T.Z. Bujar Nishani i shoqëruar nga Zonja e Parë, Odeta Nishani u nis për një vizitë zyrtare në krye të delegacionit shqiptar drejt Republikës së Turqisë.
Presidenti Nishani do të pritet gjatë kësaj vizite të rëndësishme nga Presidenti i Republikës së Turqisë, Sh.T.Z. Recep Tayyip Erdoğan, me të cilin do të zhvillojë një takim kokë më kokë si dhe bisedime dypalëshe në krye të delegacioneve zyrtare respektive, dhe më pas do të ketë takime dypalëshe me Kryetarin e Asamblesë së Madhe Kombëtare të Turqisë, Sh.T.Z. Ismail Karahman dhe me Kryeministrin turk Sh.T.Z. Binali Yildirim.
Agjenda e vizitës së Presidentit të Republikës përfshin edhe mbajtjen e një leksioni në Universitetin e Stambollit si dhe një takim të përzemërt e vëllazëror me bashkësinë shqiptaro-turke.
(XH.A/SHUPLAKA)
