Ministri i Energjetikës Damian Gjiknuri ka reaguar pas lajmit për vdekjen e drejtorit të OSHEE-së në Vlorë, Roland Saliu.
“Me pikëllim të thellë mora lajmin për vdekjen tragjike te mikut dhe bashkëpunëtorit të shkëlqyer Roland Saliu. Ngushëllimet më të thella për familjen, bashkëshorten Olën dhe tre fëmijët, të cilët humbën tragjikisht njeriun e tyre më të dashur.
Operatori i Shpërndarjes së Energjisë Elektrike humbi një prej drejtuesve më të përkushtuar. Qyteti i Vlorës humbi njeriun që u përpoq çdo ditë të jetës së tij ti shërbente qytetarëve.
Lutjet shkojnë për shpirtin e tij që të prehet në paqe dhe për familjen që Zoti t’i japë forcë në momentin më të vështirë të jetës së tyre! Lamtumirë i dashur Landi!”, shkruan Gjiknuri.
Saliu dhe pronari i një televizioni lokal në Vlorë, Ervent Hyseni humbën jetën pas një atentati në sheshin e “Flamurit” në këtë qytet. Ngjarja mësohet të ketë ndodhur pranë një lokali pak orë më parë.
Ndërsa i pari mbeti i vdekur në vend, ky i fundit u dërgua në spitalin rajonal të Vlorës për të marrë ndihmën mjekësore, mirëpo nuk arriti t’i mbijetonte dot plagëve të rënda.
Ervent Hyseni është pronari i Vlora Channel, por edhe i lokalit ku ndodhi ngjarja te “Sheshi i Flamurit”. Ai mendohet se ka qenë shënjestra e atentatit të sotëm.
Autorët e krimit mendohet t’i kenë qëlluar Saliun dhe Hysenin me një breshëri armësh nga një automjet në lëvizje. Ndërsa policia ka zbuluar edhe një mjet të braktisur në rrugën e vjetër të Panajasë, që mendohet të jetë përdorur nga ata. Krimi ka shkaktuar panik tek qytetarët që janë gjendur pranë konfliktit. (D.D/Shuplaka)
Discussion about this post